春水堂係其中一間聲稱珍珠奶茶係佢發明嘅公司，個故仔係佢地喺1987年，將粉圓加入去調左味嘅紅茶，仲命名為「珍珠奶茶」。珍珠嘅大細同埋飲管嘅粗幼都有規範，聽起黎好認真。
我喺台灣同日本都飲過春水堂，其實對佢地杯茶冇乜特別感覺，普普通通咁。開左黎香港一段時間，經過幾次都係過門不入，次次喺門口望望下，硬係覺得佢格局唔多似會煮野好食（以貌取人？），最後就會去左佢隔離嘅舖頭。早排經過銅鑼灣店，見冇乜人，又唔係太肚餓，伏得起，一於入去試試。
鐵觀音拿鐵加珍珠，茶味甘鮮馥郁，茶和奶平衡，珍珠Q彈軟硬適中，但冇乜味。紅燒牛肉麵，湯頭比較溫和、中性。台灣牛肉麵湯底常見嘅特性佢都有，但就唔會有其中一樣突別明顯。冇一層紅油浮喺面，呢一點我最鍾意。麵條係直身幼麵，有一定咬口、滑身。牛肉份量正常，用牛展，好腍好入味。慢煮豬手好夠時間，骨、肉、皮完全分離，冇牙都食到，有鹵水香，豬手好食。
—————————————
春水堂
地址：銅鑼灣軒尼斯道500號希慎廣場3樓317-319號舖
電話：36145725
Search